అమ్మగారు !!

ఈ మధ్య "అమ్మగారు" అన్న మాట తరచు వినిపిస్తున్నది. ఎక్కడ ?ఇంకెక్కడ? పేపర్లలోనూ,

టీవీల్లోను. మన రాజకీయనాయకుడొకాయన మాట్లాడుతున్నపుడల్లా "అమ్మగారు" అంటూ

ఏదో పని వాడిలా అంటుంటే "అమ్మ" అనే మంచి మాటకూడా చిరాగ్గా అనిపిస్తుంది. ఈ రోజుల్లో

యస్సెమ్ములు ( అదే నండి సర్వెంట్ మెయిడ్స్ ) కూడా అమ్మగారు అనటం మానేశారు. "ఆంటీ"

అని, ఆవిడగారి మొగుడుగారిని "అంకుల్" అనీ పిలుస్తున్నారు. తప్పేముంది? రోజులు మారాయి.

మా చిన్నప్పుడు మ ఇంటి ప్రక్క అత్తయ్యగారు ( మాకు ఇప్పటిలా ఆంటీ అని పిలవటం తెలియదు)

వాళ్ళ పనిమనిషిని దాసీది అని చెప్పేది. ఇప్పుడలా ధైర్యంగా ఎవరైనా ఆమాట అనగలరా?మా అమ్మ

మాత్రం పేరుపెట్టే పిలిచేది.

అదేమిటో పనిమనిషి రాక పోతే ఇల్లాళ్ళ పనైపొతుందట ! ఈ రోజు అర్చన రాదట ( ఆపేరు మా S. M

పేరులెండి) ఇక నా పనైపోయినట్లే అంది శ్రీమతి. ఇంకేం పనైపోతే మంచిదేగదా అన్నాను హిందూ

లో సురేంద్ర ,ఈనాడులో శ్రీధర్ కార్టూన్లను ఆల్బమ్స్ లో అంటించడానికి కట్ చేస్తూ! నా మాటను కట్

చేస్తూ మీకన్నీఎడా-పెడార్ధాల నవ్వులాటగానే వుంటాయి! మీరు చిన్నపిల్లల్లా చింపిపోసే ఈ పేపర్ల

ముక్కలు ఎత్తిపోయడానికే నాకు సగం పనైపోతుంది అంటుంది.ఒక్కోసారి "ఇదేనయం రోజూ వచ్చే

న్యూస్ పేపర్లను నెలకొకటి చొప్పున బైండు చేయించటం లేదు"అని సంతోషపడుతుంటుంది.

పనిమనుషుల సబ్జెక్ట్ మీద, మా కార్టూనిష్టులు నవ్వుల బొమ్మలు వేశారు,వేస్తున్నారు.

. ఒక్కొక్కప్పుడు అనిపిస్తుంటుంది. మన ఇంట్లో మన పని చేసుకోవడానికే ఎంతో కష్టంగా వుంటుంది.

. అలాటప్పుడు ప్రతి రోజూ ఆదివారంతో సహా పాపం అలా వాళ్ళు కష్టపడి పనిచేస్తున్నారే అని

జాలికలుగుతుంటుంది. అంతకన్నా ఏం చేయగలం చెప్పండి. అమెరికాలో వాళ్ళకంచాలు, గిన్నెలూ వాళ్ళే

తోముకుంటారట ! self help is best help కదా!

చివరగా జోకులు చెప్పుకుందాం !

సుబ్బారావుగారు పకపక నవ్వి " ఏవయ్యా,ఇదెప్పట్నించి? నీ కంచం నువ్వే

కడుక్కోడం ? " అన్నాడు.

" అబ్బే ఎన్నడూ లేదు ! " అన్నాడు చక్రవర్తి.

" ఆ, ఇందాక నా కళ్ళతో నే చూస్తినే "

" పిచ్చివాడా, అది నాదికాదోయ్, మా ఆవిడ తిన్న కంచం" అన్నాడు చక్రవర్తి

విరగబడి నవ్వుతూ. (ముళ్లపూడి నవ్వితే నవ్వండి నుంచి)

*కార్టూన్లు శ్రీ బాపు, శ్రీ జయదేవ్ లకు కృతజ్ఞతలతో*